| ស្រីលក់ស្រាសូមជម្រាប | |
| ១ - ខ្ញុំសូមជម្រាបអស់លោកស្រី | ជំទាវចាស់ខ្ចីផងទាំងឡាយ |
| មេត្តាស្ដាប់ខ្ញុំអធិប្បាយ | បកស្រាយជូនជ្រាបសព្វសេចក្ដី ។ |
| ២ - ជម្រាបប្រសាសន៍លោកជំទាវ | ជំទើរឈាមរាវស្រស់ប្រិមប្រិយ |
| កុំខឹងពីរឿងដែលខ្ញុំស្ដី | រឿងប្ដីលោកស្រីដើរសៅគ្រី ។ |
| ៣ - ព្រោះអីនាងខ្ញុំត្រូវការលុយ | លោកប្រុសទីទុយត្រូវស្រីញី |
| មិនចង់ឲ្យប្ដីដើរសៅគ្រី | គួររកវិធីចងឲ្យជាប់ ។ |
| ៤ - អប់រំណែនាំប្ដីលោកស្រី | ជំទាវចាស់ខ្ចីតាមទម្លាប់ |
| ចំណីចំណុកបញ្ចុកញាប់ | ចងលោកឲ្យជាប់ផ្គាប់ឲ្យត្រូវ ។ |
| ៥ - បើមិនអ៊ីចឹងប្ដីសៅគ្រី | ដើររកស្រីញីតាមដងផ្លូវ |
| បើខូចមិនគិតកែតម្រូវ | ចោទគេអាស្រូវដណ្ដើមប្ដី ។ |
| ៦ - តាំងដើររករឿងជេរបញ្ចោរ | ហែកអាវហែកខោខ្វះខន្តី |
| ចង់ជះអាស៊ីតដាក់ស្រីៗ | ចោទគេលួចប្ដីរបស់ខ្លួន ។ |
| ៧ - មកពីលោកស្រីគិតប្រហែស | បានប្ដីមិនចេះខំថែធួន |
| បណ្ដោយឲ្យដើរគ្មានដេកពួន | សប្បាយភ្លេចខ្លួនពួនក្នុងស្រា ។ |
| ៨ - លោកស្រីជំទាវគួរតែដឹង | ប្ដីអ្នកស្រវឹងតោងស្រវា |
| ឃើញស្រីស្អាតៗបែកប្រាជ្ញា | ដោះស្រាយតណ្ហាទើបអស់ចិត្ត ។ |
| ៩ - ចោទគេលួចប្ដីពិតជាខុស | តាមពិតលោកប្រុសគាត់ដៃស្អិត |
| មុនរករឿងខ្ញុំគួរអាណិត | ជីវិតនាងខ្ញុំស្រីលក់ស្រា ។ |
| ១០ - បានលុយតិចតួចផ្ដួចផ្ដើមផ្ដិត | ជីវិតមិនខុសពីស្រីបារ |
| រកលុយដោះស្រាយរាល់បញ្ហា | ប្រាថ្នាតែរស់អាត្មាខ្លួន ។ |
| ១១ - មិនយកទេប្ដីស្រីជំទាវ | គួរចាប់គាត់ក្រៀវទើបសមសួន |
| ព្រោះគាត់មករកស្រស់នឹមនួន | ប្រាថ្នាយកខ្លួនផ្ដល់លុយកាក់ ។ |
| ១២ - ស៊ីនំសងលុយមានអីខ្វល់ | គួរគិតឲ្យដល់ក្រែងគ្រោះថ្នាក់ |
| ខ្ញុំស្នេហ៍លោកប្រុសតែលុយកាក់ | ខ្ញុំស្ម័គ្រក៏ព្រោះដើម្បីលុយ ។ |
| ១៣ - ដូច្នេះជំទាវនិងលោកស្រី | កុំរករឿងអីស្រីទីទុយ |
| ភ្លឹបភ្លែតតាមភ្លើងត្រូវការលុយ | លោកប្រុសចង់ឃុយលុយដល់ដៃ ។ |
| ១៤ - កុំឈ្លោះនឹងខ្ញុំបើទំនេរ | ស្រីខ្ញុំស្រីគេរកកម្រៃ |
| បើទិញនំខ្ញុំលុយដល់ដៃ | ប្រុសណាដទៃដូចតែគ្នា ៕ |
UBB
កំណាព្យ
Subscribe to:
Posts (Atom)